• Таза Қазақстан
• 08 Мамыр, 2024

Яшларни изгүлүккә дәвәт қилиду

Президентимиз Қасым-Жомарт Тоқаевниң тәшәббуси билән буниңдин бир ай бурун башланған «Таза Қазақстан» акциясиму аяқлишип қалди. Қисқа вақит ичидә әмәлгә ашқан тазилиқ ишлири нәтиҗисидә елимизниң йеңи түс алғанлиғи, талашсиз. Әзәлдинла сәрәмҗан һойлилири һәм таза кочилири билән алаһидилинидиған маливайлиқлар ушбу паалийәтни қизғин қарши елип, йезисини техиму аватлаштурди. 

Рашидәм РӘҺМАНОВА,
«Uiğur avazi»
         
 Әсли маливайлиқлар йезисиниң ичидила әмәс, бәлки униң сиртидики йоллар билән биллә зәрәткалиқларниму таза тутушқа адәтләнгән. Аллиқачан уларни қоршитип, дәрвазиларни орнатқузған. Әтрапиға терәкләр билән мевилик дәрәқләр көчәтлирини тикип, пәрвиш қилишниму унтумай келиватиду. Әнди «Таза Қазақстан» акцияси давамида болса, йеза турғунлири бир-бири билән бәс-бәскә чүшкәндәк паалийәтчанлиқ тонутуп ишлиди. Шуниң билән биллә һәр һәптә өткән шәнбиликләрдин кейин «Өлүк рази болмай, тирик бейимайду» дегән нийәт билән бақилиқ болған жутдашлириниң роһиға атап нәзирләрни қилди. Биз акцияниң үчинчи һәптисидә жуқарқи зәрәткалиқтики өткән шәнбиликкә қатнишип, Сабировлар вә Нәсирдиновлар әвлади тәрипидин берилгән нәзирдин еғиз тегип қайттуқ.
Шәнбиликкә жиғилған тазилиқ тәрәпдарлири жутниң чоң жигитбеши Ришат Җамалов, униң орунбасари Малик Сабитов вә бирнәччә жилдин бери өз ихтияри билән зәрәткалиқтики тазилиқ вә тәртипни назарәт қилишни өз һөддисигә алған Алимҗан Садировниң рәһбәрлигидә көп ишларни тиндурди.
Биз мошу йәрдә Сабировлар вә Нәсирдиновларниң әҗдатлириға бираз тохтилишни тоғра көрдуқ.
Йезидики чоң кочиларниң бири Мунир Сабировниң нами билән аталған. Чоңларниң ейтишичә, Мунир диний мәктәптә дәрис берипту. Кейин «Әмгәк» колхозида рәһбәрлик хизмәтләрни қилған. Шу чағларда «10 өй» дәп аталған Ғәйрәт колхозида ишләватқинида уруш мәйданиға чақиртилип, фронтта қаза тапқан. Кәйнидин қалған әвлади билән миннәтдар жутдашлири униң исмини әбәдийләштүрүш мәхситидә башланма көтирип, йәрлик башқуруш орунлириниң қоллап-қувәтлишигә егә болған. Шундақ қилип, әлгә әмгиги сиңгән инсанниң нами билән коча аталған. 
Нәсирдиновлар әвладидинму көп инавәтлик адәмләр чиқти. Уларниң ата-бовилиридин Өмәр комсомол комитетиниң кативи, Маһмут – колхоз мудири болди. Иврайим, Ярмәһәмәт вә башқиларниңму әлгә әмгиги сиңди. Мәһәмәтәли Нәсирдинов Қ.Ғоҗамияров намидики җумһурийәтлик дөләт академиялик Уйғур музыкилиқ-комедия театрида мудирниң орунбасари болуп ишләп, һөрмәтлик дәм елишқа чиқса, униң сиңлиси Заһидәм шу қутлуқ дәргаһта актриса болуп хизмәт қиливатқиниға мана бийил 40 жилдин ашти. Шуниң билән бақилиқ болған жутдашлар роһиға атап берилгән нәзирдә мемарчилиқ пәнлириниң доктори, академик Бәкрим Ғлавдинов, пешқәдәм устаз Муһтәбәр Сабирова, Анилар кеңишиниң рәиси Меһриван Реһимбақиева вә башқилар сөз елип, бүгүнкидәк чарә-тәдбирниң жут адәмлирини бир-бири йеқинлаштуруп, балиларни изгүлүккә дәвәт қилидиғанлиғини атап өтти.  
Нәзир бериштин башқа икки әвлат әзалири мечитқа қача-қомуч вә тавут япқучлирини елип бәрди. Арзигүл Җаппарова чоңларға җәйнимаз һәдийә қилса, Пәридәм һәм Халидәм Сабировалар микрофон вә колонка тапшурди.

Алмута вилайити,
Әмгәкчиқазақ наһийәси