Özigimu, šzgilärgimu täläpçan rähbär edi

0
227 ret oqıldı

Һelimu yadimda, 1971-jili iyun' eyiniŋ bir җümä küni çüştin keyin «Kommunizm tuği» (hazirqi «Uyğur avazi») vä uniŋ qoşumçisi «Yeŋi hayat» gezitliriniŋ kollektivini tuyuqsiz baş muhärrirniŋ kabinetiğa çaqirdi.
Kirsäk, baş muhärrirniŋ ornida şu çağdiki Qazaqstan KP Märkiziy Komiteti Täşviqat vä tärğibat bšlüminiŋ başliği Andrey Plotnikov, uniŋ oŋ täripidä maŋa natonuş bir kişi, ändi Plotnikovniŋ sol täripidä «Kommunizm tuği» vä uniŋ qoşumçisi «Yeŋi hayat» gezitliriniŋ baş muhärriri Ähmätҗan Mämätov oltiratti.
— Kollektiv toluq jiğilğan bolsa, jiğinni başlaymiz, –dedi A.Plotnikov. – Mälumki, on jildin oşuq vaqittin buyan Ähmätҗan Mämätov «Kommunizm tuği» gezitini ünümlük başqurup kelivatidu. Moşu štkän jillar içidä «Kommunizm tuği» geziti mälum utuqlarni qolğa kältürdi, uniŋğa kšz jumuşqa bolmaydu. Gezit tirajiniŋ jildin-jilğa šsüvatqanliği buniŋ yarqin misalidur. Lekin, iş bar yärdä, älvättä, mälum kamçiliqlarniŋ orun elişi täbiiydur, –dedi Andrey Pavloviç vä kollektivqa sinçi kšzliri bilän qarap, sšzini davamlaşturdi. – Qazaqstan KP Märkiziy Komiteti Ähmätҗan Mämätovni Qazaqstan radiosi uyğurçä aŋlitişlar redaktsiyasiniŋ baş muhärrirligigä yštkäşni qarar qildi. Märkiziy Komitet partiyaniŋ muhim tärğibat uçastkiliriniŋ biri bolğan «Kommunizm tuği» gezitiniŋ baş muhärrirligi lavazimiğa kšpligän jillar davamida Qazaqstan KP Märkiziy Komiteti Täşviqat vä tärğibat bšlümidä instruktor lavazimida işligän Abdulla Mäşürovni layiq däp tapti, – däp oŋ täripigä qarivedi, oltarğan kişi ornidin turup, qolini kšksigä elip, beşini säl ägdi. – Abdulla Mäşürov täҗribilik partiya hadimi, härqandaq mäsilini häl qilişta partiyaviy printsipialliq bilän härikät qilişqa ämäl qilidiğan şähs. Buniŋdin keyin, oylaymänki, Abdulla Mäşürovniŋ rähbärligidä billä işläş җäriyanida uniŋ bilän til tepişip, partiya Märkiziy Komiteti jükligän väzipilärniŋ hšddisidin şäräp bilän çiqidiğiniŋlarğa işänçim kamil, aldimizdiki düşänbä künidin başlap Abdulla Mäşürov silärniŋ başliğiŋlar. İş yüzidä uniŋğa qoluŋlardin kelişiçä yardäm qilişiŋlarni štünimän.
Şundaq qilip, Abdulla Mäşürov 1971-jili iyun'din başlap «Kommunizm tuği» vä uniŋ qoşumçisi «Yeŋi hayat» gezitliriniŋ baş muhärriri bolup işläşkä başlidi. Abdulla Mäşürov işni kollektivta tärtip-intizamni çiŋitiştin, horun, tapşurulğan işqa säl qaraydiğan ayrim şähslärni tärtipkä çaqiriştin başlidi.
Abdulla aka işqa hämmidin burun kelip, bügün qilidiğan işlarni planlap, märkiziy gezitlarni bir qur kšzdin käçürüp, muhim däp tepilğan materiallarğa bälgü qoyup çiqatti. Andin bšlmilärni arilap, kimniŋ işqa kälgän-kälmigänligini kšzdin käçürätti. U, birinçi novättä, šziniŋ ikki muavini, gezitniŋ mäs°ul kativi vä bšlüm başliqliridin işni täläp qilişni adätkä aylandurğan bolup, ägär ular tapşurulğan väzipiniŋ hšddisidin šz qärälidä çiqalmisa, härbir jiğinda ularğa üz qarimay kollektiv aldida tänbih berip turatti.
İşni mundaq täläp qilişni bilgän rähbär šzigimu täläpçan edi. Һazirqi yaş jurnalistlar häyran qelişi mümkin, kündilik gezit häҗiminiŋ täŋ yerimi, bäzi çağlarda, ägär partiya plenumliri, qurultayliri, SSSR Aliy Keŋişiniŋ, Qazaqstan SSR Aliy Keŋişiniŋ sessiyaliri vä başqa çarä-tädbirlär bolup qalsa, gezitniŋ barliq bätliri räsmiy materiallar bilän tolatti. Materiallarniŋ hämmisi rus tilidin tärҗimä qilinidu, kšpligän materiallar Moskvadin ävätilätti, ägär Moskva bilän Almuta vaqtiniŋ üç saat päriq qilidiğanliğini hesapqa alsaq, ayrim vaqitlarda baş muhärrirgä tärҗimanlar, maşinistkilar, korrektorlar bilän taŋ atqiçä işläşkä toğra kelätti. Mundaq nahayiti җavapkärlik bilän işläşkä toğra kälgän päytlärdä Abdulla aka barliq materiallarni baştin-ayaq oqup, hata kätkän җaylarni tüzitip, başqilardinmu nahayiti diqqätçanliq bilän, nuqsansiz işläşni qät°iy täläp qilatti.
Biz juqurida täkitliginimizdäk, kommunistik partiya hškümranliq qilğan u dävirdä gezit materialliriniŋ asasiy qismini KPSS Märkiziy Komitetiniŋ, Qazaqstan KP Märkiziy Komitetiniŋ tohtam-qararliri, härhil mäsililärgä beğişlanğan partiya jiğinliri häqqidiki maqalilar egilätti. Mana mundaq ähvalda, gezithanlar qiziqip oquğidäk materiallar az berilätti.
Mana moşu ähvalni kšzdä tutqan Abdulla aka bir küni novättiki bir jiğinğa gezitniŋ qiziqarliq çiqişi toğriliq mäsilini otturiğa qoyup, “Gezitimizniŋ här sanini muştirilarniŋ täqäzaliq bilän kütidiğan däriҗidä çiqirişqa tirişişimiz keräk. Һärbir bšlüm, härbir hadim gezitniŋ mäzmunluq, qiziqarliq çiqişiğa šz hässisini qoşuşi lazim, bu iltimas ämäs, bälki qät°iy täläp», däp täkitlidi vä bolupmu ädäbiyat-sän°ät, mädäniyät bšlümlirigä eniq tapşurmilarni jüklidi.
Moşu jiğinda Abdulla aka bir materialni bizgä kšrsitip, «Şair vä pazändä Rähim Һoşurov uyğur taamliri, ularni täyyarlaş retseptliri toğriliq kšlämlik material yeziptu. Muällipniŋ eytişiğa qariğanda, bu birpütün kitap bolidiğan material ekän. Һazir vaqitniŋ štüşi bilän äҗdatlirimiz iҗat qilğan kšpligän läzzätlik taamlirimizniŋ täyyarliniş usulliri untulup ketip baridu. Bu bizgä äҗdatlirimizdin miras bolup qalğan mädäniyät mirasimizni saqlap, keläçäk ävlatqa qalduruşimiz keräk. Rähim Һoşurovniŋ moşu uyğur taamliri häqqidiki materialini gezitniŋ birnäççä sanida bärsäk degän oyğa käldim, silär nemä däysilär?», däp kollektivqa muraҗiät qildi.
Kollektiv Abdulla akiniŋ bu täklivini bir eğizdin qollidi. Şundaq qilip, hälqimizniŋ untuluşqa yüzlängän, kšpçilik yaşlirimiz tamamän bilmäydiğan äҗdatlirimizniŋ näççä yüzligän härhil läzzätlik taamliri toğriliq materiallar jil boyi turaqliq berilip turdi. Keyin Rähim aka Һoşurov moşu gezit materialliri asasida «Uyğur taamliri» degän kitavini näşir qildurdi.
1976-jili novättiki jilğa muştiri toplaş, gezitlirimizniŋ süpitini tehimu juquri kštiriş mäsililirigä munasivätlik bir çoŋ jiğin uyuşturulğan edi. Baş muhärrir «Kommunizm tuği» vä uniŋ qoşumçisi «Yeŋi hayat» gezitliriniŋ keläçäktä qilişqa tegişlik işliri, muştiri toplaş vä başqa mäsililär üstidä ätrapliq sšz qildi. Mäzkür jiğinğa gezitlirimizniŋ җankšyärliri, mäşhur mädäniyät ärbapliri – Qazaqstan häliq yazğuçisi Ziya Sämädi, SSSR häliq artisti, kompozitor Quddus Ğoҗamiyarov vä kšrnäklik alim Ğoҗähmät Sädvaqasovniŋmu iştrak qilğanliği esimda.
Moşu jiğinda Ziya Sämädi Abdulla Mäşürovniŋ «Kommunizm tuği» gezitiğa baş muhärrir bolup kälgändin keyinki gezittiki iҗabiy šzgirişlärgä alahidä tohtilip štti. Ziya aka gezitniŋ birnäççä sanida davamliq berilgän Rähim Һoşurovniŋ «Uyğur taamliri» degän maqalisi häqqidä pikir qilip, “Meniŋ bilişimçä, inimiz Abdulla Mäşürovniŋ bevasitä täşäbbusi bilän Rähim Һoşurovniŋ «Uyğur taamliri» degän kšlämlik, mupässäl materiali berildi. Ägär uyğur sän°itiniŋ җävhiri –“On ikki muqamini” Turdahun Älnäğmä, Rozi Tämbir käbi sän°ätkarlirimiz saqlap, keyinki ävlatqa miras qaldurğan bolsa, inimiz Rähim Һoşurov qedimiy hälqimizniŋ bebaha mädäniyät mirasi – milliy taamlirimizniŋ täyyarliniş näzäriyäsini keyinki ävlatqa miras qilip qaldurdi. İnimiz Abdullam bu muhim mäsiligä säl qarimay, uni qolğa elip hšddisidin çiqişqa hässä qoşti. Bu päqätla alqişlaşqa ärziydiğan çoŋ iş», däp Abdulla Mäşürovniŋ gezit kollektivini başquruştiki rolini alahidä atap kšrsätkän edi.
Moşu baş qoşuşta ataqliq tilşunas alim Ğoҗähmät Sädvaqasov šz sšzidä Abdulla Mäşürovniŋ päqätla juquriniŋ yol-yoruğiğa qarapla iş qilidiğan rähbär ämäs, bälki dävir tälivi bilän hesaplişip, redaktsiya kollektivini mähsätkä muvapiq toğra başqurup kelivatqanliğiğa alahidä tohtaldi.
Mana gezitimiz näşir qilinğandin buyan «Sovetlär Soyuzi», «ukaz», «sotsialistik çepiş», «ministrlar soveti», «revolyutsiya», «respublika» degängä ohşaş kšpligän sšzlärni rusçä qandaq bolsa, šz petiçä qollinip kälgän edi. Abdulla Mäşürov bu mäsilini šzgärtişni mähsät qilip, štkändä biz tilçi alimlarniŋ, näşriyatlar hadimliriniŋ beşini qoşup, «dügläk üstäl» štküzdi. Abdullamniŋ şähsiy täşäbbusi bilän tilçi alimlarniŋ pikir-täklipliri asasida kšpligän atalğular mümkinqädär uyğur tilida qolliniş qarar qilindi. Ändi bolsa, «Sovetlär Soyuzi – Keŋäş İttipaqi», «ukaz – pärman», «ministrlar soveti – ministrlar keŋişi», «revolyutsiya – inqilap», «respublika – җumhuriyät» däp vä kšpligän başqimu atalğular uyğurçä qollinidiğan boldi. Moşu işniŋ täşäbbuskari Abdullam buniŋ barliq җavapkärligini šz üstigä aldi, – däp baş muhärrirniŋ paaliyitigä Ğ.Sädvaqasovmu juquri baha bärdi.
Ändi Quddus aka Ğoҗamiyarov «Kommunizm tuği» gezitiniŋ uyğur sän°itiniŋ altun bšşügi – Uyğur teatriniŋ paaliyitigä dayim alahidä ähmiyät berip kelivatqanliği üstidä tohtaldi vä Abdulla Mäşürov uzun jillar partiya organlirida işläp kälgän partiya hadimi bolğini bilän, sän°ätkä bepärva adäm ämäsligini, šziniŋ birnäççä qetim Abdulla Mäşürovni Uyğur teatrida, Abay namidiki opera vä balet teatrida, Lermontov namidiki rus drama teatrida bolğan qoyulumlarniŋ prem'eriliriğa kälgänligini kšrgänligi, sän°ätni sšygän adäm šz hälqiniŋ täğdirigä bepärva bolmaydiğanliğini alahidä täkitligän edi.
1976-jili küz päsli edi, bir küni Abdulla aka gezitimizniŋ tärҗimä bšlümigä kirip, bizdin ähval sorap, andin: «Män Qazaqstan KP Märkiziy Komitetiğa bir muhim mäsilini häl qiliş üçün berip käldim» däp sšz başlidi. Tärҗimä bšlüminiŋ başliği, ataqliq şair Һezim aka Bähniyazov, tärҗiman Tursun aka Däriya, Änvär aka Luqmanov vä män “nemä işkin” däp baş muhärrirniŋ ağziğa qariduq.
— Aldimizdiki jilniŋ 1-mart küni «Kommunizm tuği» gezitiniŋ näşir qilinişqa başlanğiniğa 20 jil tolidu. Män moşu sänäni šz däriҗisidä munasip nişanlaş häqqidä Märkiziy Komitetniŋ Täşviqat vä tärğibat bšlüminiŋ başliği Plotnikovqa yoluqup, mäslihät soriğan edim. U kişi «20 jil – bu çoŋ sänä ämäs, äslidä 25, 50, 60, 75 jilliq sänälär nişanlinidu», däp bu mäsiligä ançimu kšŋülläşmidi. Yänä bäş-altä jildin keyin kim bar, kim yoq, uni yaratqan egäm bilidu. Şuniŋğa käypiyatim çüşüp, silärgä kirivedim» dedi.
Meniŋ yeqinda Moskvada çiqidiğan «Sovetskaya Rossiya» degän gezitniŋ 20 jilliq märikisi nişanlanğanliği toğriliq materialni oquğanliğim esimğa kelip qaldi. «Abdulla aka, – däp muraҗiät qildim baş muhärrirgä, – ägär iҗazät bolsa, meniŋ bir sšzüm bar edi», däp ornumdin turdum. Abdulla aka maŋa qarap, andin “Türeke (u Tursun Däriyani şundaq atatti) bu şagirtiŋizniŋ sšzini tiŋşap baqamduq?!», däp u kişigä beqip küldi. Tursun aka «Bir çoŋniŋ, bir kiçikniŋ gepini tiŋşa degän sšz bar, qeni, uka, sšzlä», dedi.
Män yeqinda «Sovetskaya Rossiya» degän gezitniŋ 20 jilliq märikisi nişanlanğanliği toğriliq materialni oquğanliğimni eytivedim, Abdulla aka därru «Qaysi gezitta oquduŋ? Һazir, mümkin bolsa, şu gezitni tapqina!» däp nahayiti җiddiyläşti. Män u gezitni saqlap qoyğan edim, uniŋ birinçi betidä gezitniŋ 20 jilliq märikisi nişanlanğanliği toğriliq, täntänilärgä KPSS Märkiziy Komiteti Säyasiy byurosiniŋ birnäççä äzasiniŋ, başqimu lavazimliq şähslärniŋ iştrak qilğanliği vä hakazilar toğriliq yezilğanliğini eyttim, andin üstäl tartmisidin heliqi gezitni elip, Abdulla akiğa sundum. U gezittiki materialni ünlük oqup çiqti vä mana bu gezitni elip ätä A.Plotnikovqa yänä yoluqimän. Biz partiyaniŋ šgäy balisi ämäs, bu mäsilini çoqum iҗabiy häl qilişimiz keräk», dedi hoşalliğini yoşuralmay.
Baş muhärrir Abdulla Mäşürov bir işni qolğa alsa, uniŋ häl boluşi üçün tinmay härikät qilip, ahiri kšzligän mähsitigä yätmigiçä tinim tapmatti. Bir häptidin keyin bolsa keräk, Abdulla aka nahayiti üstün käypiyatta bizniŋ bšlümgä kirip käldidä: «Sšyünçä!», däp çaqçaq qilip bir külüvetip sšz başlidi: «Män heliqi gezitni elip, Plotnikovqa yoluqtum vä «Sovetskaya Rossiya» gezitiniŋ 20 jilliq yubileyi štküzülüptu, gezit veteranliri mukapatliniptu, nemişkä «Kommunizm tuği» gezitiniŋ 20 jilliğini nişanlaşqa bolmaydekän?» däp mäsilini uttur qoyivedim, Plotnikov säl oylinip, «Abdulla Maşuroviç, män bšlümniŋ işliri bilän ätä yoldaş Dinmuhammed Qonaevniŋ hozurida bolumän, şu çağda «Kommunizm tuği» gezitiniŋ 20 jilliq märikisini štküzüş mäsilisinimu otturiğa qoyimän. U kişi kelişsä, män saŋa telefon qilimän”, – degän edi. Mana hazir män Märkiziy Komitettin uttur silärgä huş hävär elin käldim. Andrey Plotnikov D.A. Qonaevqa bu mäsilä häqqidä eytqan ekän, u kişi: «Rebyata iz «Kommunizm tugi» delayut svoyu rabotu ne huje çem rebyata iz «Sevetskoy Rossii». Obosnuyte, nado otprazdnovat' 20 letie «Kommunizm tugi», däptu. Ändi, huda buyrisa, kelär jili, yäni 1977-jili 1-martta gezitimizniŋ märikisini nişanlaymiz», däp hoşalliğini yoşuralmay.
1977-jili 1-mart küni җumhuriyätlärara «Kommunizm tuği» gezitiniŋ 20 jilliq märikisi Uyğur teatrida dağduğiliq nişanlandi. Bu täntänilik jiğinğa Qazaqstan SSR Aliy Keŋişi Prezidiuminiŋ räisi S.Niyazbekov, Qazaqstan KP Märkiziy Komitetiniŋ kativi S.İmaşev, Märkiziy Komitet Täşviqat vä tärğibat bšlüminiŋ başliği Şestakov, (A.Plotnikov başqa hizmätkä yštkilip kätkän edi — Ya.S.) vä başqimu lavazimliq şähslär, Almutida näşir qilinidiğan gezit-jurnallarniŋ baş muhärrirliri, radio-televiziya hadimliri, Özbäkstandin, Qirğizstandin, Türkmänstandin kälgän mehmanlar, ämgäk ilğarliri, ziyalilar, studentlar bolup, teatr zaliğa kişilär patmay, bäzilär šrä turğan edi.
Jiğinda «Kommunizm tuği» gezitiniŋ baş muhärriri Abdulla Mäşürov doklad bilän sšzgä çiqip, gezitniŋ 20 jilda besip štkän yoliğa täpsiliy tohtaldi.
Şuniŋdin keyin täbrik sšzgä çiqqan Qazaqstan SSR Aliy Keŋişi Prezidiuminiŋ räisi S.Niyazbekov җumhuriyätlärara «Kommunizm tuği» gezitiniŋ näşir qilinğiniğa 20 jil toluşi munasiviti bilän gezitniŋ Qazaqstan SSR Aliy Keŋişi Prezidiuminiŋ Pähriy yarliği bilän mukapatlanğanliği toğriliq Pärmanni oqudi vä Pähriy yarliqni baş muhärrir Abdulla Mäşürovqa tapşurdi.
Gezitimizniŋ 20 jilliq märikisi Uyğur teatri artistliriniŋ çoŋ kontserti bilän ayaqlaşti.
Һelimu yadimda, 1978-jilniŋ qiş ayliriniŋ bir küni Abdulla aka bizniŋ bšlümgä kirip, «Jigitlär, bir mäsilä kallamğa kirivelip, maŋa zadila aram bärmäyvatidu. Һazir gezitimiz häptisigä üç qetim, jiliğa 156 san çiqivatidu. Gezitimizda räsmiy materiallar nahayiti besim bolup, hälqimizniŋ ädäbiyat-sän°iti, tarihi, mädäniyiti, qedimiy urpi-adätlirigä ait materiallar nahayiti az berilivatidu. Bizdä birär bädiiy jurnal näşir qilinmaydu. Uyğur geziti uyğur hälqiniŋ ğäm-qayğusiğimu, şatliğiğimu ortaq boluşi keräk. Gezitimizni kündilik näşirgä aylanduruş, yäni häptisigä bäş qetim, jiliğa 250 san çiqirişimiz lazim. Bu häqiqiy muddia bolğan bolar edi. Mana moşu mäsilini häl qilişqa bäl bağlimaqçimän. Silärniŋ pikriŋlarni biläy devidim», däp qaldi.
Bšlüm başliğimiz Һezim aka Bähniyazov, «Abdullam, nahayiti izgü sovapliq işqa bäl bağlapsiz, ägär gezitimiz häptisigä bäş qetim çiqsa, ädäbiyat-sän°ätçilär sizgä mäŋgü minnätdar bolidu, çünki bäzi şair-yazğuçilirimizniŋ, başqimu ädiplirimizniŋ äsärliri topa besip yatidu. Ularniŋ gezit betidä yoruq kšrsä, nur üstigä nur bolğan bolar edi», däp baş muhärrirniŋ täşäbbusini qollap, pikir qildi. Änvär aka Lohmanovmu Һezim akiniŋ pikrini toluq qollaydiğanliğini täkitlidi. Ändi Tursun Däriya bolsa, tämkinlik bilän «Abdullam nahayiti muhim ähmiyätlik işqa bäl bağlaşni niyät qipsiz. Siz ätimalim, keräklik kişilär bilän kelişip, bu mubaräk işqa qädäm taşliğansiz?!», däp baş muhärrirgä baqti.
Abdulla aka miyiğida külüp «Häviriŋlar bar, män yeqinda Taşkäntkä, Frunzeğa (hazirqi Bişkek) komandirovkiğa berip käldim. Taşkänttä Özbäkstan Teleradio komiteti räisiniŋ muavini Heläm aka Hudaybärdiev başliq uyğur ziyaliliri, Frunzeda filosofiya pänliriniŋ doktori Äziz aka Narinbaev başliq uyğur ziyaliliri bilän uçrişişlarni štküzduq. Män moşu mäsilini otturiğa qoydum vä gezitimizni häptisigä bäş qetim çiqiriş mäsilisini asaslandurup, Moskvağa — KPSS Märkiziy Komitetiniŋ baş kativi L.İ. Brejnevniŋ namiğa, şundaqla Almutiğa — KPSS Säyasiy byurosiniŋ äzasi, Qazaqstan KP Märkiziy Komitetiniŋ birinçi kativi D.A. Qonaevniŋ namiğa uniŋğa yezişni, iltimasqa abroy-inavätlik adämlärniŋ imza qoyuşi keräkligini eyttim. Ändi pat-arida uyğurlar ziç yaşaydiğan nahiyälärni arilap, tegişlik kişilär bilän uçrişimän. İşimiz oŋğa tartidu däp oylaymän», degän gäpni qildi.
Mana şuniŋdin keyin Moskvağa L.İ. Brejnevniŋ namiğa, Almutiğa D.A. Qonaevniŋ namiğa «Kommunizm tuği» gezitiniŋ kündilik gezitqa aylanduruş iltimasi bilän yezilğan kollektivliq hätlär tolup ketidu. Undaq hätlär baş muhärrir Abdulla Mäşürovniŋmu namiğa kšpläp kelidu. Abdulla aka heçnärsidin häviri yoq adämdäk, bu hätlärni Qazaqstan KP Märkiziy Komitetiniŋ ideologiya işliriğa mäs°ul kativiğa kšrsitidu. U kişi «şundaq hätlär bizgimu käldi, Moskvağimu nurğun hätlär yeziliptu, pat-arida bu mäsilä byuroda qarilip, Moskvağa yollinişi mümkin», däydu.
Şundaq qilip, baş muhärrir Abdulla Mäşürovniŋ bevasitä täşäbbusi vä җiddiy härikät qilişi nätiҗisidä bu mäsilä KPSS Märkiziy Komitetiniŋ Kativatida qarilip, 1979-jili 1-yanvar'din başlap җumhuriyätlärara «Kommunizm tuği» geziti kündilik, häptisigä bäş qetim çiqidiğan boldi. Bu munasivät bilän gezitqa qoşumçä ştatlar berildi, ularniŋ hizmät orni – kabinetlar elişmu häl qilindi, yeŋi hadimlarğa šylär berildi.
Gezitimiz häptisigä bäş qetim çiqişqa başliğandin keyin, uniŋğa berilidiğan materiallarniŋ süpitini yahşilaş mäsilisigä baş muhärrir alahidä kšŋül bšlüp, hadimlarğa bolğan täläpni tehimu küçäytti. Baş muhärrir şundaqla Özbäkstan SSR boyiçä Taşkänt şähiridä vä Qirğizstan SSR boyiçä Frunze şähiridä birdin muhbir tutuş ştatinimu häl qildi. Ayrim jilliri «Kommunizm tuği» gezitiniŋ tiraji 25 miŋğa, uniŋ qoşumçisi “Yeŋi hayat” gezitiniŋ tiraji 12 miŋğa yätti. Gezitlirimiz tirajiniŋ bu däriҗidä šsüşidä, älvättä, baş muhärrir Abdulla Mäşürovniŋ hässisi az bolmidi.
1978-jilniŋ beşida gezitimizniŋ baş muhärriri Abdulla aka Mäşürov 50 yaşqa tolğanliği munasiviti bilän Qazaqstan SSR Aliy Keŋişi prezidiuminiŋ Pähriy yarliği bilän mukapatlandi. Abdulla aka arman qilğan mähsitigä yetip, «Kommunizm tuği» gezitini kündilik gezitqa aylandurup, yäŋni türüp, җiddiy işläşkä kirişkän edi. Amma rähimsiz äҗäl 1979-jili 27-avgust küni uni arimizdin tuyuqsiz elip kätti. Ägär Abdulla aka hayat bolğan bolsa, moşu künlärdä uniŋ 90 yaşliq märikisini täntänilik nişanliğan bolar eduq.
Yadikar SABİTOV.

Bälüşüş

Javap qalduruŋ